Tolosaldeko Irakurketa Feminista Taldeen II. Topaketa egin dute, gaur, Ikaztegietan. Iaz Altzon egin zuten, eta aurten, Ikaztegietako Irakurketa Taldea arduratu da eguna antolatzeaz. Goizean, bizipenak elkarbanatzeko tartea hartu dute Kattalin Mineren gidaritzapean. Ahizpatasuna izan dute hizketarako gaia, eta Minerrek eraman ditu testu zati ezberdinak.
Ondoren, bazkaltzeko tartea hartu dute, eta arratsaldean, bertso saio literarioaz gozatzeko aukera izan dute. Maialen Akizu, Oihana Arana, eta Saioa Alkaiza aritu dira kantuan, eta Ainhoa Urien izan dute gidari, gaiak jartzen.