Ikaztegietako Kultura batzordeak bigarren sendabelarren ikastaroa antolatu du, hilaren 21erako. Kasu honetan, Ainitze Sala Insaustiren eskutik herrian bertan dituzten sendabelarrak ezagutzeko aukera izango dute ikaztegietarrek. Sendabelarrak ezagutzeaz gain, beraiek nola erabili ikasiko dute.
10:00etan elkartuko dira, eta ezer baino lehen, herriko zubitik abiatuta ibilaldia egingo dute inguruko sendabelarrak identifikatuz eta bilduz. Ondoren, ukenduak egingo dituzte udaletxeko areto nagusian.
Interesatuek izena eman beharko dute udaletxean, eta horretarako azken eguna hilaren 17a, asteartea, da. Izena ematearekin batera pertsona bakoitzak bost euro ordaindu beharko du. Kultura batzordetik adierazi dutenez lehentasuna herritarrek izango dute.