Sendabelarren ikastaroa egin nahi duenak izena eman beharko du

Hilaren 21ean Ainitze Sala Insaustik sendabelarren gaineko ikastaroa eskainiko du, Ikaztegietan. Interesatuek asteartea baino lehen eman beharko dute izena udaletxean, eta bost euro ordaindu beharko du pertsona bakoitzak.

Ikaztegietako Kultura batzordeak bigarren sendabelarren ikastaroa antolatu du, hilaren 21erako. Kasu honetan, Ainitze Sala Insaustiren eskutik herrian bertan dituzten sendabelarrak ezagutzeko aukera izango dute ikaztegietarrek. Sendabelarrak ezagutzeaz gain, beraiek nola erabili ikasiko dute.

10:00etan elkartuko dira, eta ezer baino lehen, herriko zubitik abiatuta ibilaldia egingo dute inguruko sendabelarrak identifikatuz eta bilduz. Ondoren, ukenduak egingo dituzte udaletxeko areto nagusian.

Interesatuek izena eman beharko dute udaletxean, eta horretarako azken eguna hilaren 17a, asteartea, da. Izena ematearekin batera pertsona bakoitzak bost euro ordaindu beharko du. Kultura batzordetik adierazi dutenez lehentasuna herritarrek izango dute.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!