Ikasturtea bukatu berri den arren, dagoeneko Ikaztegietako Udala irailera begira jarri da. Kirol eskaintza zabaldu die herritarrei eta ostirala, hilak 9, baino lehen eman beharko dute izena interesatuek. Pilates, Aerobic, body training eta yoga ikastaroetan izena eman daiteke, eta hori bai, taldeak osatu ahal izateko gutxienez sei pertsonek eman beharko dute izena.
Izena emateko udaletxera bertara joan daiteke, edo 943 65 33 29 telefono zenbakira deitu. Izena ematen dutenen artean whatsapp taldeak osatuko dituzte, eta izena ematen dutenen artean adostuko dituztela egunak eta orduak aurreratu dute udaletik. Osasun egoera dela-eta, segurtasun eta higiene neurriak errespetatuko dituzte. Ikastaroren batean zortzi lagun baino gehiagok ematen badute izena, bi talde egingo dituzte.
Behin izena emanez gero, udaletxetik jakinarazi dute ikasturte osorako konpromisoa hartzen duela izena eman duen herritarrak, hau da, baja soilik gaixotasun edo pisuzko arrazoiengatik onartuko dute.
Kostuari dagokionean, seiko taldea bada hilean 39 euro ordaindu beharko da, zazpi izanez gero 33 euro eta zortziko taldearen kasuan, 29 euro.