Ikaztegietarrek Larreta baserriko eta Aranburuko produktuak herrian bertan jasotzeko aukera izango dute aurrerantzean. Herritarrak udaletxera zuzendu beharko dira zerbitzuan parte hartu nahi dutela esateko, eta irailean zehar hasiko dira banaketa egiten.
Elikagaiak kiroldegiko gela batean jaso ahal izango dira, hornitzaileek utziko baitituzte bertan zehaztuko duten egun eta orduan. Herritarrek kiroldegia irekita dagoen egun eta ordu batean jaso ahal izango dituzte. Izan ere, aurrez izena ematen dutenek kiroldegiko gelako giltza jasoko dute.
Hauek dira jaso ahal izango diren produktuak. Larreta baserriko jogurtak, petixuak, jogurta bereziak, gazta freskoa, gazta biguna, izozkiak eta esne gordina, eta Aranburu oilategiko oiloen arrautza dozena edo sagar zukua.