Ikaztegietara errepidez hurbildu den orori abisua ezarri diote, lehen biribilgunean: Kontuz, festak. Bada, gaur, kontuak bikoitza beharko du izan, giroa ere halaxe izango delako, kuadrilla egunaren aitzakian.
Goizean pilota partidak izan dira eta, norbere bazkaria prestatzen hasi aurretik, 47ak herrian egitasmoari babesa adierazteko elkarretaratzea egin dute ikaztegietarrek. Ondoren piztu dituzte suak, prestatu barazki, haragi eta itsaskiak, eta bota arroza. Izan ere, paella izan da, gaur, Ikaztegietako kuadrilla eguneko erregina.
Haur, gazte eta heldu, guztiek batera bazkaldu dute elizako aterpean, eta bazkalondoan trikipoteak altxatuko ditu mahaitik, gorputzak eusten dion bitarte.
Oraindik orduak dituzte aurretik, baina, biharkoarekin, ikaztegietarrek hurrengo urtera arte agurtu beharko dituzte festak.