Saio praktikoa etxean energia eta dirua aurrezteko

Tolosaldeko Ataria 2018ko aza. 13a, 11:29

Gipuzkoako Foru Aldundiko Ingurumen eta Obra Hidraulikoetako Departamentuak etxeetan, enpresetan eta elkarteetan energia modu eraginkorrean erabiliz eta erosotasunik galdu gabe energia eta dirua aurrezteko gomendioak ezagutzera emateko doako saioak antolatu ditu.

Energia aurrezkiari eta eraginkortasunari buruzko aholku praktikoen gida banatuko zaie saiora joaten direnei. Gida horretan "modu erraz eta ulergarrian azaltzen dira" energia aurrezteko eta eraginkorragoak izateko baliagarriak diren hainbat aholku.

Hori horrela, Ikaztegietako Udalak Gipuzkoa Argitu izeneko tailerretan parte hartzera animatu nahi ditu herritarrak eta udalerriko gizarte eta ekonomia eragileak. Saioa azaroaren 15ean, osteguna, izango da, 18:00etan, udaletxeko bilkura aretoan. Beharrezkoa da aldez aurretik izena ematea. Horretarako idatzi posta elektroniko bat udala@ikaztegieta.eus helbidera edo deitu 943 653 329 telefono zenbakira. Azaroan 13a da azken eguna horretarako.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!