Peña 6an utzi zuen duela bi aste Beñat Urretabizkaiak. Bada, bide bera jarraituz, aise irabazi dio ikaztegietarrak Peio Etxeberriari. Horrenbestez, finalaurrekoak jokatuko ditu datorren astean.
Indar erakustaldia eman du Urretabizkaiak, hasieratik, sasoiko dagoela erakutsiz eta erabat zentratuta. Nafarra airez jokatzera behartu du, eta ezin izan ditu Ikaztegietako pilotariaren pilotakadak erantzun. Behartuta ibili da Etxeberria. Eskualdekoak sekulako pilotakadak eman ditu, tarteka, Labriteko txalo zaparradak irabaziz.
Ikaztegietar talde bat izan da, gainera, Iruñeko pilotalekuan, beren herritarra animatuz, eta giro ederra jarri dute. Amaieran, Urretabizkaia berarekin eta Juan Martinez de Irujo pilotari ohiarekin argazkia ateratzeko aukera ere izan dute.
