Tolosan elkarretaratzea egingo da, 12:00etan, Trianguloan, eta Donostian manifestazioa 20:00etan hasiko da Boulebarretik. Deialdian zehazten denez, zapi morea besoan jartzeko, edota zaintza edota etxeko lanak irudikatzen dituzten elementuak (erratza, amantala, umeen karroak,...) hartzeko eskatu dute.
Deialdia egin dutenek diotenez, "aspertu gara erosketak guk egiteaz, eta bihar zer bazkalduko dugun erabakitzeaz. Nekatu gara labadora guk jarri ezean, arropa garbirik ez aurkitzeaz. Konturatu gara amatasun senak esplotatu egiten gaituela. Zergatik sinestarazi digute hau guztia emakumeon ardura dela?!". "Denon borroka" dela gaineratu dute, eta "emakumeok planto!" egiteko deia egin.
Bestalde, martxoak 9rako beste bi hitzordu zehaztu dituzte. 19:00etan, herriko emakumeak kontu kontari elkartzeko aukera izango da, udaletxeko areto nagusian. "Adin ezberdinetakoak elkartu eta esperientziak trukatuz, besteak beste, egin nahiko genukeenaz hitz egiteko". 21:00etan, emakumeen afaria izango da Herrigintza elkartean. Ostatu tabernan dago izena emateko zerrenda, eta azken eguna martxoaren 7a izango da.