Iaz antolatu zuen Gazte Taldeak dantza ikastaroa, festei begira. Uztaileko astelehen eta asteazkenetan ariko dira saioak egiten kiroldegiko gimnasioan, 19:30etik 21:00etara. "Oinarrizko dantza ikasi eta primeran pasatzea" da ikastaroen asmoa, eta Gazte Taldetik herritarrei parte hartzera animatzen die.
Bestalde, aurtengo festetarako kirol desafioa berdinkideagoa izatea nahi dute, eta "ilusio bereziarekin" ari dira brile jolasa antolatzen. "Urteroko parte hartzaileez gain, normalean plaza erdira animatzen ez den jendea gonbidatu nahi dugu jolasera", azaldu dute Gazte Taldekoek. Herritarrei parte hartzeko deialdia egin dute: "Lotsa ematen badizu, jolasten ez badakizu, gazteentzako gauza dela uste baduzu... edo aitzakia gehiagoren bila bazabiltza, zuretzat eginda dago hau!". Jolasa ezagutzeko saioa antolatu dute uztailaren 5erako, asteazkena, 19:30ean, kiroldegian.