Sagarrandoak orain daude bete-beteta, eta sagardotegi guztiak berriz, muztioa dariola. Lehen lana sagarrak biltzea izan ohi da. Batzuk kixkia izango dute sagarrak saskiratzeko. Besteek, gerria gehiago makurtuta, eskuz bilduko dituzte sagarrak. Zakuak bete eta bete, sagar on guztiak bildu arte. Behin sagasti guztia bildu ostean, dolarera gerturatu beharko da. Zakuak hustu, eta sagarrak berriz banan bana begiratuz txarrak albo batera doaz eta onak uretan pasa eta gero, prozesua martxan jarriko da sagarrak joz.
MUZTIO GOZO-GOZOA
Txikitutako sagarrak pilatzen hastean lehen zukua aterako da. Gozoa. Prentsatu ostean, ordea, eta errekatxo baten moduan botako du muztioa. Hori guztia izango da upelera doana. Upela bete, eta itxarotea geratuko da. Sagardoak egin, egin behar du, eta horretarako hilabete batzuk behar ditu. Kolorea argitzeaz gain, zaporea ere guztiz aldatuko zaio. Gustuen araberakoa izan ohi da sagardo on eta txarraren artekoa. Urte berriarekin batera, eta plater on bat alboan hartuta, txotx egitea baino ez litzateke faltako.
Urtarriletik aurrera sagardoa txotxetik edan nahi duenak, aurretik atera behar izaten ditu eltzetik babak. Hobeto esanda, aurretik jo behar izaten du sagarra. Urte sasoi honetan egiten da sagardoa bai sagardotegi, baserri edota dolarea eta sagarrak dituzten edozein txokotan.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!