Kuboak banatuta, azpiegitura lanak eginda eta informazioa banatuta; hasi dira Ikaztegietan atez ateko hondakin bilketarekin. 18:00etan hasiko ziren atzo eta papera zein kartoia bilduz ekin zioten atez atekoari.
Iker Otamendi Ikaztegietako alkateak Tolosaldeko Ataria irratiari esan dionez, gaikako bilketa aukeratu dute honek daturik onenak ematen dituelako, eta Ikaztegietako izaera bera ere sistema honetarako egokia delako.
Atez atekoaren inguruko edozein zalantza argitzeko, udaletxean informazio bulegoa jarri dute; astearteetan 09:00etatik 11:00etara, eta asteazkenetan, 18:00etatik 20:00etara. Telefonoz edo e-mailez ere argitu daitezke zalantzak, ikaztegieta@tolosaldea.org helbidera idatzita, edo 661 55 97 57 zenbakira deituta.
Web orria eta aplikazioa
Ikaztegietako erronka berriaren inguruko edo beste herrietako albisteak jarraitzeko, mankomunitateak bere web orriaren berri eman du: www.tolosaldea.org. Atez atekoaren jarraipenaz gain, herri bakoitzeko bilketen inguruko informazioa dago bertan zintzilik. Horrez gain, traste zaharrak ateratzeko egutegia ere jarri dute eskura. «Bestetik, atez ateko bilketa duten herrietan dagoeneko martxan dugun sistema hobetzeko parte hartze prozesuan zabaltzen ari garen galdetegia ere herritarren eskura dago, bide honetatik ere betetzeko aukera dago», jakinarazi dute mankomunitatetik.
Webgunearekin bezala, aplikazio baten berri ere eman nahi izan dute Tolosaldeko Mankomunitatetik. Tablet zein mugikorretarako aplikazio horretan, birziklapenaren inguruko informazioa ematen da: hondakinen bilatzaile bat dago, eta aplikazioak esaten du nora bota hondakin bakoitza; nankomunitatea osatzen duten herri guztietako egutegiak daude, eta baita bestelako informazioa ere. Aplikazioa erabili ahal izateko, mugikorrean edota tabletean aplikazioak deskargatzerakoan Tolosaldeako Mankomunitatea bilatu behar da. Apple zein Android sistementzat da baliagarria.