Adiskidetasuna, oroitzapenak eta jai-giroa ardatz dituen festaz gozatzeko aukera izango dute ibartarrek larunbatean. Izan ere, Betiko Gaztetasuna lelopean, 1934 eta 1964 urteen artean jaiotako kintoen jaia ospatuko dute.
Herriko plazan elkartuko dira parte hartzaile guztiak, 12:00etan, egun osoko egitarauari hasiera emanez. Bertan, 13:00etan, talde-argazkia aterako dute, eta ondoren, 14:00etan, Izaskunera igoko dira autobusez, bazkariaz gozatzeko. Bazkariaren ostean, jaiak aurrera jarraituko du DJ saioarekin.