Hitanoa bultzatzeko jaio zen Zopa antzezlana Segurako Xirikara umorezko antzerki talde amateurraren eskutik. Antzezlan honen arrakastarekin jarraituz, Ama, begira zazu antzezlana oroitu eta omendu nahi dute eta herriz herri bistaratu.
Hain justu, duela 30 urte estreinatu zuten antzezlanaren bertsio bat eskainiko du antzerki taldeak. Idoia Uranga zuzendariaren gidaritzapean izango dira oholtza gainean Aiora Juantorena, Aimar Balerdi, Arantxi Barandiaran, Koldo Alustiza, Ekiñe Izagirre, Maider Hernandez, Luli Telleria eta Olatz Etxeberria aktoreak.
Guztira sei sketch-ez osatutako ikuskizuna izango da. Jatetxe bateko langileen kontuak, moja eta gotzainaren arteko hika-mikak, harri altxatzaile baten ezinezko entrenamendua, neska zahar parearen etxean atea jotzen duen Jehovaren lekuko baten bisita, Torremolinosen uda pasan dagoen bikotearen ibilerak, eta azkenik, Euskal Telebistako kazetari bati kaleko inkesta bat egin nahian gertatzen zaizkionak. Umorea izango du ardatz obrak eta hitanoa plazaratuko dute beste behin ere.