Txapelketa Club Natacion Metropolek, Espainiako Igeriketa Federazioak (RFEN) eta Kirol Kontseilu Nagusiak antolatu zuten, eta guztira 98 klubetako 383 igerilarik hartu zuten parte.
Mateosek 3.000 metroko proban (+40 master maila) hirugarren postua lortu zuen, eta brontzezko domina eskuratu. Ariel Hernandez izan zen irabazlea (38.45,37), Andres Martin bigarrena (40.20,03) eta Mateosek 41.38,47ko denbora lortu zuen. Horrez gain, 1.500 metroko proban (+40 master maila) seigarren postuan sailkatu zen ibartarra, 20.13,61ko denborarekin.
2014an igeriketara itzuli zenetik, batez ere ur irekietako zeharkaldietan aritu da Mateos, eta igerilekuko lehiaketa iraganeko kontutzat izan du. Txapelketa horretan, azken momentuan izena eman zuen, hilabete inguruko prestaketarekin, neguan motibazioa mantentzeko eta lehiatzeko aukera izateko. «Ez nuen halako emaitzarik espero eta oso pozik nago lortutakoarekin. Etorkizunean ez dut baztertzen master mailako igerilekuko lehiaketetan berriro parte hartzea, esperientzia oso polita izan baita», azaldu du igerilari ibartarrak.