Beste domina bat eskuratu du Ibarra Sokatira Taldeak Munduko Txapelketan. Atzokoa kluben arteko txapelketan brontzezkoa bazen, gaurkoan zilarrezkoa izan da nazioen txapelketan Euskal Herria ordezkatuz. 500 kiloko mailan lortu dute bigarren postua. Sei taldek hartu dute parte maila horretan: Euskal Herria, Txina Taipei, Korea, Thailandia, Japonia eta Vietnam.
Lehendabizi sailkapena izan da jokoan, eta ibartarrak bigarren geratu dira Txina Taipeiren atzetik, beste guztien aurkako tiraldiak irabazita. Ondoren, finalerdietan lau talde onenak sartu dira. Korearen aurka jokatu dute, horiek hirugarren bukatu baitute sailkapen fasea. Beste finalerdia Txina Taipei eta Thailandia artekoa izan da. Korearen kontra irabazita, finalean Txina Taipei izan dute aurkari. «Saiatu gara, borrokatu dugu, baina izugarrizko maila dute, eta gaur gaurkoz zaila da beraiei aurre egitea», azaldu dute.
Bestalde, Ibarra Sokatira Taldeko Lander Otermin Abadiño taldekoekin aritu da lehian Euskal Herria ordezkatuz 600 kilotan, eta hirugarren egin dute, azken neurketan Ingalaterrari irabazita. Lehen postuan Txina Taipei geratu da eta bigarrengoan Herbehereak.
Azkenik, Ibarra Sokatira Taldeko Naroa Floresek 23 urtez azpiko Euskal Herriko selekzioarekin parte hartu du txapelketa mistoan, eta hirugarren postuan geratu dira.