Ibarrako Udalak Aranzadi Zientzia Elkartearekin batera astronomia ikastaroa antolatu du. Maiatzean izango da, euskaraz emango dute, eta lau tailerrez egongo da osatua. Ikastaroan izena emateko epea apirilaren 28tik maiatzaren 12ra bitarte izango da Ibarrako kultur etxean. Plazak mugatuak dira eta parte hartzeko gutxieneko adina 16 urtekoa izango da. Informazio gehiago nahi duenak Ibarrako kultur etxera jo dezake edo bertara deitu, 943 670 399 zenbakira.
Tailerrei dagokionez, lehena maiatzaren 21ean izango da, asteazkena, 19:00etatik 20:30era. Zerua ezagutzen izango du izenburua, eta konstelazioak zer diren, zertarako balio duten, planisferio bat nola erabiltzen den edota nola desberdintzen diren izarrak eta planetak ikasi ahalko da. Programa informatiko baten laguntzarekin konstelazioak desberdintzen eta zerua ezagutzen erakutsiko dute.
Bigarren tailerra, Orientazio astronomikoa izenekoa, maiatzaren 26an, astelehena, izango da, 19:00etatik 20:30era. Orientazioa izango da tailerraren ardatz. «GPS-a asmakizun berria da, garai batean jendeak beste metodo batzuk erabiltzen zituen orientatzeko: Eguzkia, izarrak, iparrorratza». Bada, tailerrean haien funtzionamendua ikasiko ahalko da, eta iparrorratz bat egingo dute.
Hirugarrena, Nork esan du hemen ez direla izarrak ikusten?, maiatzaren 28an, asteazkena, izango da, 19:00etatik 20:30era. Bertan, proiekzio baten bitartez konstelazioak zer diren ikasi ahalko da, konstelaziorik garrantzitsuenak ezagutu eta tailerrarekin amaitzeko planisferio bat eraikiko dute parte hartzaileek, euritako batean.
Laugarren eta azken tailerra, Gaueko behaketa izango da. Maiatzaren 30ean izango da, ostirala, 23:00etatik 00:30era. Bi zatitan banatuko dute. Zeru behaketa egingo dute lehendabizi. Horretarako, teleskopio batzuk jarriko dituzte kalean. Ondoren, azalpen eta xehetasunak emango dituzte. Hala, ordenagailu baten bidez zerua eta konstelazioak ikusi ahal izango dira, adituen azalpenekin batera.