Collage analogikoa egiten ikasteko ikastaro intentsiboa egingo dute maiatzaren 18an, Ibarrako Studio Maroca izeneko diseinuzko sormen estudioan. Tailer praktikoa izango da, «eskuekin lan egiteko, begiradarekin jolasteko, baina, batez ere, burua ahultzeko. Konexioak sortzeko, zatiak eraikitzeko eta sormenezko teknikekin esperimentatzeko».
Hainbat ariketaren bidez, collagearen aukerak aztertuko dituzte, elkarren ondoan jarrita, geometriaren, bolumenaren, patroien, zatiketaren edota abstrakzioaren bidez, irudiei begiratzen eta hainbat ikuspegitatik konektatzen ikasiz. Gainera, beste artista batzuen lanaren proiekzioa eta collage munduarekin lotutako liburu, film, erakusketa eta beste askoren lanak ere ikusi eta aztertuko dituzte.
Studio Marocako arduraduna den Susana Blascok bere lan artistikoa eta egiteko moduak partekatuko ditu eta aldizkari, argazki, paper eta tresna ugari jarriko ditu eskura. Hala ere, parte hartzaile bakoitzak bere argazki, grabatu edo ilustrazioekin lan egiteko aukera izango du.
Tailerrak zortzi orduko iraupena izango du; goizean 10:00etatik 14:00etara izango da, eta arratsaldean, 16:00etatik 20:00etara. Interesa dutenek aurretik eman beharko dute izena eta 150 euro ordaindu. Informazio gehiago Studio Marocaren webgunean lor daiteke.