LAB sindikatuak jakitera eman duenez, CAF-Rail Line enpresarekin akordioa lortu dute. Hain justu, hiru urterako akordioa lortu dutela azaldu dute, «langile batzarrean gehiengo zabalez onartu dena». Soldata igoerak KPIaren gainetik, urteko lanaldia 28 ordutan murriztea edo telelanerako aukeren hedapena nabarmendu ditu sindikatuak lorpen nagusi moduan.
LABek gogoratu duenez, «borrokaren bideari» ekin zioten enpresa mailako lehen akordioa erdiesteko eta hainbat lanuzte eta mobilizazio burutu dituzte azken asteetan. Mahai negoziatzaileko azken bi bileretan enpresak jarrera aldatu duela azaldu du LABek, eta edukia duten proposamenak aurkeztu dituela.
«Langileon arteko elkartasun eta konpromisoaren bidez lortu da lehen aldiz enpresa lan baldintzak modu kolektiboan negoziatzera eserarazi eta eduki nabarmenak dituen akordioa erdiestea», azaldu dute sindikatutik. Ibarrako lantegiko langileak zoriondu dituzte lorpenagatik. «Bide beretik iritsiko dira lorpenak aurrerantzean ere», esan dute.