Emanaldi bereziak antolatu ditu Gabonetarako Ibarrako Hauspoa kultur elkarteak. Abenduaren 27an izango da lehena eta bertso saio musikatua egingo dute, 19:30etan, elizan. Hiletarik balego, 20:00etan hasiko litzateke. Bertan, Oihana Iguaran, Julio Soto, Eki Manterola eta Maialen Akizu arituko dira bertsotan. Musikaria Izaro Yañez izango da, eta gai jartzailea, berriz, Joanes Zubia ibartarra. Sarrerak bost euro balio du eta egunean bertan ordaindu beharko da.
Bestetik, urtarrilaren 3an, musika eta dantza ikuskizun berezia ikusteko aukera izango da 19:30etan, Belabieta kiroldegian. Gandeia musika talde nafarrak, Alurr dantza taldeko zazpi kideekin eta dantzari nafar batekin landu dute emanaldia. Sarrerak bost euro balio du eta Zubiaurre tabernan eta Oramahai okindegian daude salgai.