Babes mezuez bete dute arratsaldean Ibarrako plaza. Izan ere, asteburuan, Uzturpe Ikastolako kanpo espazio berrian izan diren «bandalismo ekintza larriak» salatzeko elkartu ziren herritarrak. «Kalte materialez gain, emakumeon aurkako mezu sexista, gogor eta iraingarriak egin dizkigute ikastolako hormetan, pertsonalizatuak, eta min handia egiteko intentzio argiarekin», kontatu dute.
Ikastolako komunitate osoak irmoki gaitzetsi ditu gertaerak eta esan du ez duela halakorik onartzen, «gure herriaren etorkizuna eta hezkuntza loratzen den espazioan, ikastolako eta bertako komunitatea herri honek duen altxorretako bat baita».
Bertan, elkarrekin, hezkidetzan, errespetuan eta bizikidetzan oinarritutako gizarte bat eraikitzen jarraitzeko konpromisoa berretsiko dutela esan dute. «Guztion artean eraikitzen ditugu balioak, eta horiek lantzea eta sendotzea da gure eginkizuna, ikasgeletan eta ikastolako espazio guztietan».
Ikastolako hezkuntza komunitatea anitza dela gaineratu dute, eta esan dute «elkarlana, elkar errespetatzea eta elkarbizitza» dituztela eguneroko ardatz. «Gaur, gure begi aurrean porrotaren irudia ikusi baldin badugu ere, oraindik sinisten dugu mundu hau eta herri hau aldatzeko hezkuntzak duen indarrean. Horrela jarraituko dugu, bat eginda eta indartsu, biharko gizarte hobe eta justuagoren alde».