Bi taldeek une gozoa bizi dute, Errege Kopako 4. kanporaketa jokatzeko motibazioa gehituta. Otxarkoagakoek Industrias Santa Coloma hartuko dute asteazkenean, hilak 27, Casillan. Lauburuk, berriz, asteartean, hilak 26, Ciudad Realeko Quesos Hidalgo Manzanares hartuko du. Urtero ikusteko aukerarik ez dagoen maila handiko bi hitzordu lehen mailako bi talderen aurka.
Oso partida serioa izan zen Belabietan jokatutakoa. Bi taldeak ondo prestaturik eta lehen abisua 10 segundora iritsi zelarik ibartarren zutoinera. Diestrok zuzentzen dituen jokalarien nagusitasuna agirikoa izan zen partida osoan zehar, baina sortutako aukerak ez ziren goletan gauzatzen, talde bizkaitarraren defentsa ordenagatik eta 40 minutuetan atezainak egindako lan onagatik.
Victorrek 36. minutuan ireki zuen atea zutoinari itsatsitako jaurtiketa on batekin, eta Rafak 2-0ekoa egin zuen Otxartabek bostekoa atera berri zuenean. Rodrik zuzendutakoek protesta egin zuten, sabaiko sarea ukitu zuela esanez. Otxartabek tartea txikitu zuen 38. minutuan Pauek egindako 2-1ekoarekin, baina Victorrek, partida ona egin zuenak, markagailua itxi zuen azken minutuan.