Eguraldi bikainarekin egin dute gaur arratsaldean XIV. Ibarrako Piparra Mendi Duatloia. Banakako modalitatean, gizonezkoetan bi lagun elkarrekin helmugaratu dira: Iker Eskisabel eskoriatzarra eta Ibai Ormaetxea arrasatearra. Bukaera batera egin dute eta helmugara elkarrekin iritsi dira, eta biak garaile sentitzen direla esan dute, txipen teknologiak Eskisabeli lehen postua eman dion arren. 1.19.31ko denbora egin dute. Hirugarren Eneko Gurrutxaga amasarra izan da, 1.20.38 eginez.
Emakumezkoetan Maite Urteaga zumaiarra izan da irabazlea, 1.42.12 eginez. Bizikletako azken zatian zulatua izan arren, eutsi egin dio, eta proba jarraitu ahal izan du, lehen postua lortuz. Bigarrena Maddi Olaetxea izan da, justu minutu batera, 1.43.12 eginez. Podiumeko hirugarren postura igo da Nekane Pradera gasteiztarra.
Erreleboetan Andoni Guridi eta Aitor Urizar oñatiarrak izan dira irabazleak, 1.19.14 eginez. Bigarrenak Liher Unzueta eta Iker Barandiaran arrasatearrak izan dira (1.20.01), eta hirugarrenak Mikel Olalde eta Pablo Zubia oñatiarrak (1.20.53).
