Bizikletari eta mendiari, gorazarre

Bigarrengo aldiz antolatu du Bidetxur Kirol Klubak Ibarrako Mendi Bizikleta Festa. Larunbat honetan egingo da, egun osoan zehar. Iaz egindako ekitaldiak mantendu dituzte eta aurtengoan beste bat gehitu dute, Ibarra Enduro proba. «Badakigu zaletasuna dagoela hemen inguruan, eta mendiko eta hiriko enduroa nahasten diren bi jaitsiera antolatu ditugu», esan du Iban Amondarain Bidetxur Kirol Klubeko kideak.

Lehenengo jaitsiera Leaburutik izango da, eta bigarrena Izaskundik, eta biek helmuga herriko plazan izango dute. «Proba egin dugu ikusteko jendearen erantzuna zein den. Izen ematea epea zabaldu egin dugu eta ostegunean eta ostiralean ere eman daiteke». Horretarako Bidetxur taldearen Instagram kontua erabili daiteke edo 607325164 zenbakira deitu.

Iaz egin moduan, mendi bizikletako irteerekin hasiko dute eguna. Helduak lehenengo abiatuko dira, hiru ordu inguruko ibilbidea egiteko, eta gaztetxoek pare bat ordukoa egingo dute. «Gaztetxoen irteeran geldialdi pare bat egingo ditugu, ezustekoren bat gertatuz gero zer egin daitekeen erakusteko, adibidez, zulatu bat izaten badugu», esan du Amondarainek. Ez da beharrezkoa izena ematea, eta irteera ordua baino lehen plazara agertzea nahiko da. «Bi irteeren bukaera batera samar izatea da asmoa, eta argazkiren bat ateratzeko aprobetxatu nahi dugu».

Arratsaldean, iaz arrakasta izan zuen bigarren eskuko azoka errepikatzea erabaki dute. Aurretik materiala jasoko da, eta gero jarriko da salmentan. «Iaz material dezente saldu zen, eta jendea kontentu geratu zen ekitaldiarekin», azaldu du Amondarainek. Haurrentzako ginkanak ere izango du bere tartea, eta baita trial erakustaldiak ere. «Irene Caminosekin kontaktuan gaude, eta ez dakigu azkenean berak posible izango duen, baina Ibarran trial eskola du, eta bertako ikasleek behintzat parte hartuko lukete erakustaldian.