Ezustekoa izan da Ibarrako San Bartolome jaien hasieran. Izan ere, Bartola eta Bartolo erraldoiei beste bi erraldoi batuko zaizkie aurrerantzean. Danborrada taldea izan da txupinazoa botatzearen arduradun, eta Bartolak eta Bartolok dantza egin ostean etorri da sorpresa. Igor Zapirain alkateak iragarri du ezustekoa, azalduz azken urtean herriko gazteek egindako lanketaren fruitua izan dela.
Bada, kalejiran iritsi dira plazara bi pertsonaia berriak, herritarren harridura eta pozerako. Nola ez, herriko ikur den piperra ikus daiteke bi erraldoi berrietan eta herriaren kolorea den morea ere nagusi da euren jantzietan. Pertsonaiek oraingoz ez dute izenik, eta udaletik esan dutenez, herritarrek parte hartze prozesu bitartez jarriko diete izena.
Sorpresatxoaren ostean, kalejiran abiatu dira Bartola eta Bartolo bi erraldoi berriekin, eta euren atzetik Ibarrara etorritako Pasaiako, Villabonako eta Gironako Fal·lera Gironina erraldoien eta buruhandien konpartsak joan dira.
Igandera bitarte ekitaldiz beteriko egitaraua dute aurretik ibartarrek.
