Handia egin du Goar Lopetegi Nieto Domusa Teknik Lana taldeko mendi lasterkari ibartarrak. Hirugarren postuan helmugaratu zen, atzo, UTMB World Series-erako puntuagarria den Hoka Val d'Aran Pyrenees lasterketetako Camins d'Her proban. Lesen (Lleida) hasi eta Vielhan (Lleida) amaitu zen proba, Aran ibarran barrena 110 kilometroko luzera eta 6.400 metroko desnibel positiboa zuen ibilbidea burutu ondoren. Lasterketaren gogortasun teknikoaz gain, baldintza klimatologiko gogorrak izan zituzten korrikalariek; tenperatura altuenak 32 graduraino heldu ziren.
06:00etan abiatu ziren korrikalariak, eta Lopetegik 12 ordu, 41 minutu eta 51 segundoko denbora egin zuen. Brooks Trail Runners taldeko Luke Grenfell-Shaw britainiarra izan zen txapelduna, 12 ordu 5 minutu eta 3 segundoko denbora eginda. Bigarren postuan Asics Trail taldeko Andreu Simon Aymerich bartzelonarra helmugaratu zen, 12 ordu, 31 minutu eta 8 segundo behar izan zituen proba burutzeko.