Ohi bezala, festa giroan agurtzen dute maiatza Izaskunen eta aurten ere halaxe egin dute. Izan ere, Izaskungo jaietako azken eguna ari dira ospatzen. Eguraldi igarpenak gaurko euria ematen bazuen ere, eguraldia lagun izan dute goiz guztian zehar. Dianarekin hasi dute eguna, eta ohiko hitzorduari huts egin gabe, meza nagusia eta hamaiketako herrikoia egin dute ondoren.
Bertso saioa ere ez da falta izan aurtengo azken festa egunean. Iaz bezala, Sebastian Lizaso eta Anjelmari Peñagarikano bertsolariak izan dira saioko protagonistak, eta gai-jartzaile lanetan, berriz, Joxe Ramon Aldasoro aritu da. Adin guztietako herritar ugari izan da eta barre-algaren artean gozatu du saioa.
Goizeko hitzordura huts egin duten herritarrek, arratsaldean bigarren bertso saio batez gozatzeko aukera izango dute, 18:30etan. Hala ere horren aurretik eta atzetik ere izango dira zenbait ekintza. Esaterako, 17:30etan, Alurr dantza taldearen emanaldiaz gozatzeko aukera izango da, eta 19:30etan, berriz, Ostolaza eta Narbaiza trikitilarien erromeriarekin agurtuko dituzte aurtengo jaiak.