Areto futboleko Lauburu Ibarra KE taldeko bi jokalarik lehendik zuten hitzarmena berritu dute. Oier Azkunaga Txikik hirugarren denboraldia du Ibarran, eta beste bi gehiagorako luzatu du kontratua. «Oso pozik nago, lehen egunetik etxean bezala sentitzen naizelako, eta horregatik egingo ditut beste bi urte hemen», adierazi du.
Beñat Zalduak lehen urtea du Ibarran, eta beste urte baterako luzatu du hitzarmena. «Oso gustura nago, bai klubak, bai jokalariek, baita herriak ere, oso ondo sentiarazi nautelako», esan du.
Datozen denboraldietarako ikasten eta hobetzen jarraitzea da bi jokalarien helburua. «Eta ea Laubururekin Bigarren Mailara igotzea lortzen dugun», gaineratu dute.