Kontzertua bi koruen desfilearekin hasi zen, elizaren erditik aldareraino, non abeslariak ahotsen arabera kokatu ziren. Guztira 22 eta 35 koralistek ordezkatzen zituzten bi abesbatzak, hurrenez hurren, sopranoak, kontraltoak, tenoreak eta baxuak tartean. Ikoroa abesbatzako kide gisa den Xantos Agirrezabalak sarrera labur bat egin zuen, eta bi taldeen ibilbidea azaldu zuen. Ondoren, bi koruek, elkarrekin, Agurra kantua abestu zuten, txistu eta danbolinaren laguntzaz, eta Ibarrako Alurr dantza taldeko lau dantzariek ere parte hartu zuten.
Ibarrako Ikoroa abesbatzak prestatuta zuen errepertorioa abestu zuen, lehenik, eta Euskal Herriko kantuarekin amaitu zuen. Entzuleen txaloen atzetik, Zegamako Orkatz abesbatzaren txanda izan zen. Hauek, S. Ryall konpositorearen Dirty old town kantarekin amaitu zuten, txalo artean.
Bi emanaldien ostean, Jose Ramon Eguibar Ikoroa abesbatzako zuzendariak zapi bereizgarria jarri zion Osane Leiza Orkatz abesbatzako zuzendariari. Aldi berean, Iñaki Olartek, Orkatz abesbatzaren izenean, opari bat eman zion Ramon de Beguiristai Ikoroa abesbatza batzarreko kideari. Hain zuzen, koru bat irudikatzen duen buztinezko oroigarri bat.
Amaitzeko, bi abesbatzek Txoria Txori kantua abestu zuten, Osane Leiza zuzendariaren zuzendaritzapean, eta ikusleak haiekin batera abestera animatu zituzten. Ikusleek harrera ona egin zioten gonbidapenari, horietako askok abestera animatu baitzen. Modu horretan eman zioten amaiera emanaldiari.
Ikoroa abesbatzak eskerrak eman nahi izan dizkie, besteak beste, Orkatz abesbatzari, Alurr taldeko dantzariei, Jon txistulariari, Elizako arduraduna den Ritari, kontzertua egin zen elizako parrokoari, Ibarrako Udalari eta Sendi Ekintza elkarteari, «azaldutako prestutasunagatik eta ekitaldi horretan laguntzeko prest egoteagatik».