Martxan da Ibarrako Udalak antolatzen duen Auzoz Auzo ekimena, herriko auzoetako egoera gertutik ezagutzeko helburuarekin. Horrela, auzoetan bizi diren herritarrekin bilerak egingo dituzte, euren ideia eta proposamenak entzuteko. Bihar egingo dute lehenengo batzarra, 19:00etan, San Inazio auzoko Bizi Nahi jubilatuen elkarteko lokalean. Bertan, ondorengo auzotarrekin elkartuko dira udal ordezkariak: San Inazio auzoa 1-17, Emeterio arrese 1-24, Apatterreka 1-15 bakoitiak, Otarreaga 1-11 eta Molpoido.
Udaletik adierazi dutenez, «auzoan bizi direnek ezagutzen dute hobetoen bertako egoera eta, beraz, bertakoek dakite auzoak zer behar duen». Horregatik, auzoari dagozkion hainbat gai landuko dituzte, besteak beste, udalak zein aurreikuspen dituen auzoarekiko, orain arte egin diren aldaketak zergatik egin dituzten, eta hemendik aurrera zer egingo duten. Bide beretik, bizilagunek aukera izango dute haien galderak udal ordezkariei zuzenean egiteko.