Egungo erronkei aurre egiteko guztion indarrak batu eta erantzun integral bat ematea da Ibarrako Udalaren helburua, eta horretarako, herritarren elkarlana eta konpromisoa ezinbestekoak dituztela adierazi dute udaletik: «Hainbat zarete dagoeneko plan honen hausnarketan eta sorreran parte hartzeko konpromisoa adierazi duzuen eragileak eta herritarrak». Hortaz, hiru saio proposatu ditu aurtengo lehen hiruhilekorako. Saio guztiak kultur etxean izango dira 17:00etatik 19:00etara, eta Oinherri herri hezitzaileen elkartearen aholkularitza izango dute prozesua martxan jartzeko.
Hiru saio
Lehen saioa urtarrilaren 23an izango da eta diagnostiko partekatua egingo dute. Bertan, jada egiten diren egitasmoak zerrendatu; egitasmo hauek aurrera eramaten dituzten eragileak identifikatu; eta indarguneak eta ahulguneak identifikatuko dituzte erronkak definitzeko.
Bigarren saioa otsailaren 20an izango da, eta hezkuntzarako herri estrategia garatuko dute. Bertan, aukera ezberdinak mahai gaineratu; testuinguru bat kokatu; eta herri bezala ipar konpartitu bat eraiki, erronkak definitu eta lehentasunak adostuko dituzte.
Hirugarren eta azken saioa martxoaren 19an izango dute, eta bertan, plangintza partekatua egingo dute. Maiztasuna, funtzionamendua, elkarrekin egin ditzaketen ekintzak eta baliabideak identifikatuko dituzte eta plangintza partekatua definituko dute.
Bertaratzeko asmoa duten herritarrek aldez aurretik jakinarazi beharko dute euskara@ibarra.eus helbidera idatziz.