Ibarrako Udalak jolas komunitarioen gunea sortuko du herriko haur eta gaztetxoentzat. Horretarako, udalak gordeta duen egurrezko etxola bat jartzeko asmoa du herriko plazan, haurrek jostailuekin eta komunitatean jolasteko aukera bultzatu asmoz.
Igor Zapirain Ibarrako alkateak kontatu duenez, «betiko jolasetatik edo mugikorretik aldentzeko» ideia ona izan zitekeela pentsatu zuten; hala, «garai bateko jolasak» eta talde lana bultzatzea pentsatu dute: «sokatira bezalako jokoak edota oreka mantentzekoak egongo dira, bestea beste». Ibarrako sokatira taldekoek sortu zuten herri kirol eskolarekin elkarlanean, euren materiala erabiliz herri kirolarekin lotutako jolasak egiteko asmoa dutela gehitu du alkateak.
Bilera informatiboa
Etxolaren inguruko ideia eta kokagunea aztertzeko asmoz, gaur, 17:30ean 2 eta 12 urte arteko gurasoekin bilera informatiboa egingo dute, plazako aterpean. Zapirainen esanetan, «gurasoen parte hartzea sustatuz eta denen arteko lanketa bat eginez errazagoa izaten da ekimenaren parte sentitzea». Jolas komunitarioen gunea egunero eta orduero zabalik egotea da asmoa. Horretarako, denen arteko zaintza eta errespetua beharrezkoa izango dela esan du alkateak; «ez badugu denon artean zaintzen, etxola kendu egin beharko dugu, eta hori tristea izango litzateke».