Ibarrako taldea gogor aritu zen txapelaren lehian, Beti Gazte talde nafarrarekin lehia estua izanik. Bi taldeen arteko tiraldiak luzeak eta gogorrak izan ziren. Baina, azkenean, ibartarrek bigarren postua eta zilarrezko domina eskuratu zituzten. Halere, eginiko lanarekin eta lortutako emaitzekin gustura, hurrengo asteburuan misto mailan txapela eskuratzeko animo handiz jarraituko dute lanean. Horrela izan zen sailkapena: 1. Beti Gazte, 2. Ibarra, 3. Gaztedi, 4. Badaiotz, 5. Amaiur eta 6. Abadiño.
Gizonezkoen 560 kiloko txapelketa egun bakarrean lehiatzen da. Sei taldek hartu zuten parte: Abadiño, Txantrea, Beti Gazte, Ñapurrak, Gaztedi eta Gohierri eta Gaztedi gailendu zen. Ibarrako taldea ez zen pisu horretan lehiatu.
Denboraldia amaitu eta munduko txapelketara joan aurretik, asteburu honetan jokatuko dira azken txapelketak. Junior eta 23 urtez azpiko kategoriak larunbatean, Matienan, jokatuko dira, eta misto kategoria igande goizean Ibarran, Belabieta kiroldegiko frontoian, 11:30etik aurrera. Ibarrako taldeak, igandekoari begira, misto kategoria horretan ere emaitza onak lortzeko gogotsu ekingo dio.
Argazkiak: Potronko