Goizean goizetik herriko sukaldariak babarruna prestatzen aritu dira Ibarrako plazan. Hamaika bikote izan dira guztira lehiaketan parte hartu dutenak. Hauspoa elkarteko antolatzaileek kilo erdi babarrun eta ura baino ez diete eman parte hartzaileei. Hortik aurrera bikote bakoitzak babarruna prestatzeko artea erakutsi behar izan du. Izan ere, plater goxoena sukaldatzen zuen bikoteak saria jaso du.
Gainontzeko herritarrek ere babarrunak probatzeko aukera izango dute eguerdian plazan bertan egingo duten bazkari herrikoian. Hala ere, festak arratsaldean ere jarraipena izango du. Euskararen Egunaren harira, euskal kantuen bingoa egingo dute 16:45etan hasita, eta ondoren, kantu biran ibiliko dira herrian zehar. Iluntzean Xeplan egingo duten afari meriendarekin amaituko dute eguna.