Jendetza bildu da gaur Izaskunen. Izan ere, ikuskizun bikaina eskaini dute gaur goizean Eneko Otaño eta Iñaki Azurmendi aizkolariek. Bi saio egin behar izan dituzte aizkolariek; lehena, ea nork ebakitzen zuen 45 ontzakoa golpe gutxiagotan, eta bigarrena, ea nork mozten zituen sei egurrak azkarrago.
Herri bazkaria ere antolatu dute gaurkoan, eta ondoren, Julio Soto eta Iker Zubeldia bertsolariek emanaldia eskainiko dute. Arratsaldean ere hainbat ekitaldi izango dira. Hala nola, Lopene ganadutegiaren eskutik, haurrentzako zezen txikiak eta poniak izango dira 18:00etan, eta egunarekin amaitzeko Orkestrina Band Jazpana taldearen kontzertua 19:30etan.