Emakumeen areto futbola indartzeko apustua egiten jarraitzen du Lauburuk. Lan horretan, apirilaren 24rako, emakume alebin, infantil eta kadeteei zuzendutako Emakumezkoen Txapelketako bigarren edizioa antolatu dute.
2019-2020 denboraldian egin zen lehena, eta izandako "arrakasta" ikusita, aurten ere hiru klub gonbidatu dituzte, txapelketa «ahalik eta osoena» izan dadin: Iruñeako Lacturale Orvina, Kantabriako CDE Muslera eta Zaragozako FSF Cesar Augusta.
Alebin eta kadete mailako talde bana ekarriko dituzte nafarrek, kantabriarrek infantil talde bat, eta zaragozarrek kategoria bakoitzetik talde bana. Txapelketa 09:00etan hasiko da Belabietan, Xepla elkartean atsedenaldia egingo dute bazkaltzeko, eta ondoren, 17:45ak aldera arte luzatuko dira finalak.
Lauburutik esan dutenez, emakume futbolariei ahalik eta gehien gozatzeko aukera eskaini nahi die txapelketaren bidez, izan ere, gogorarazi nahi dute Gipuzkoako oinarrizko kategorietan emakumezkoen talderik ez dagoela. Emakumeen kirolaren aldeko deialdia egin dute: "Haiek irekiko diete bidea atzetik datozenei".