Ibarrako Udalak pertsona bat kontratatu du urte beterako Pauso Berriak programaren barruan. Programa Atzegi eta Gureak elkarteek sortu zuten eta helburua da adimen-desgaitasuna duten pertsonak kontratatzea, beren garapen pertsonala eta soziala errazteko. Pertsona hori astelehenetik ostiralera ari da praktiketan eta udalean prestakuntza jasoko du bulegoan lan egiteko eta hainbat zerbitzu egiteko. Martxoaren 15ean hasi zituen praktikak eta abenduaren 31ra arte egongo da lanean.
PSE-EE alderdia pozik azaldu da kontratazioarekin eta Fernando Narciso zinegotziak esan du Ibarrako Udala espazio inklusiboagoa izatea lortzea oso pozgarria dela. "Are gehiago, garrantzi berezia du gaurkoa bezalako egun batean, Down Sindromearen Munduko Eguna ospatzen baita", gaineratu du. Gogorarazi duenez, duela urtebete inguru, adimen-desgaitasuna duten pertsonak kontratatzeari buruzko mozio bat erregistratu zuen udalean, eta udal gobernuari eskatu zion beharrezko kreditu aldaketa egin zezala Pauso Berriak programan parte hartzea diruz laguntzeko. Udalbatzak ondo ikusi zuen sozialisten ekimena, eta beraz EH Bildu eta EAJ alderdiei erakutsitako sentsibilitatea eskertu die. "Zorionez, Ibarrako Udalak aukera-berdintasuna eta guztiok lan-merkatuan heltzea bultzatuko du", esan du Narcisok.
Azkenik, adierazi du eguneroko gaiez arduratzea oso garrantzitsua dela. "Hurbileko politika da, txikiaren politika, baina gauza handiei eragiten diena, batez ere pertsonen bihotzari".