Hirugarren urtez Bitartekari irakurle kluba jarriko du martxan Ibarrako Udalak. Imanol Mercero Galtzagorri elkarteko kidea arituko da gidari lanetan. Hainbat helburu ditu dinamikak, horien artean, Ibarrako haurren eta gazteen irakurzaletasuna sustatzea, euskal literaturarekiko eta idazleekiko ezagutza eta jakin-mina areagotzea, eta euskararen balioaz eta aberastasunaz jabetzea.
Solasaldietan parte hartzen dutenek, beraz, 2 eta 16 urte bitarteko haurrei eta gazteei bideratzen zaien literaturaz hausnartzeko aukera izango dute. Egitasmoa urrian hasiko da; hamabost egunean behin bilduko da taldea eta saioak ordu bete edo ordu eta erdi inguru iraungo du. Izena emateko epea irailaren 20tik 30era izango da eta udal liburutegian egin beharko da.