Lago de Sanabriako bi probatan hirugarren izan da Ioseba Mateos

Ordizia K.E.-ko igerilari ibartarrak 6.000 metroko distantzian hirugarren postua (1.35.10) lortu zuen 35 urtetik gorako gizonezkoen mailan, Raul Gonzalez (1.24.55) eta Maximo Carbajo (1.32.11) igerilarien atzetik. Sailkapen orokorrean laugarren izan zen. Berez, antolatzailea zen Gaztela Leongo Igeriketa Federazioak Gonzalez eta Carbajo deskalifikatu zituen zirkuituko buiak gaizki egiteagatik. "Arautegia argi zegoen: buia guztiak ezkerretara utzi behar ziren", azaldu du Mateosek. "Beraiek erreklamazio bat egin zuten, beraien GPS track-a erakusten metro berdinak egin zituztela esanez, eta antolatzaileek tentsioren momentuan beraien GPS-ak onartu zituzten". GPSak metro berdinak eman ditzakeela, baina buiak saltatu zituztela gaineratu du Mateosek. "Gaizki egina, buien arautegia ez baitzuten bete, tranpa eginez. Sari banaketaren momentuan igerilariak eta publikoa garrasika hasi ziren, iruzurra egin zutela esanez bi igerilariei", azaldu du ibartarrak. Erabaki horrek zuzenean eragin zion, bestela 35 urtetik gorakoetan lehenengo sailkatua izango zelako eta bigarrena sailkapen orokorrean.

Beste zeharkaldian, 1.500 metrokoan, 18 urtez gorakoetan hirugarren izan zen Mateos (21.38), Jorge Gimenoren (19.41) eta Ruben Perezen (20.13) atzetik. Sailkapen orokorrean zazpigarren izan zen Mateos.

Hurrengo zeharkaldia VI. Triple Corona Illas Atlanticas igeri zeharkaldia izango du ibartarrak, Ons eta Combarro artekoa. Larunbatean izango da, irailaren 4an, eta 23 kilometro distantzia izango da. Proba sei ordu inguruan igeri egitea izango da Mateosen erronka nagusia.