Unai Iribar ibartarra da, Asier Etxeberria nafarrarekin batera Euskaltel-Euskadiren koloreak defendatuko dituen kide berria.
Laboral Kutxan aritu da orain arte Iribar, eta honako hitzak izan ditu Ion Lazkano Laboral Kutxako zuzendariak ibartarrarentzat: "Unai anbizio handikoa da, oso lehiakorra, beti umore onekoa eta txantxazalea". Benjaminetatik hasi eta jubeniletara bitarte, Tolosako Oriako Txirrindulari Eskolan korritu zuen Iribarrek, eta 23 urtez azpikoetan Ampo eta Laboral Kutxan. Denboraldi honetan, Murgian, Legazpin eta Duranan izan da garaile, Gorlan eta Urrakin bigarren egin du, 23 urtez azpiko Espainiako Txapelketan brontzea eskuratu du eta 15. egin du 23 urtez azpiko Giroan.
Iribar bera pozik agertu da eta esperientzia berria bizitzeko gogoz: "Ilusioz gainezka nago, etxeko taldeak nirekin egin duen apustuarekin. Egia da ez dela nire lehen esperientzia profesionala izango, baina berezia izango da talde honekin lasterketa batzuk egitea. Gogo handia dut eta, aldi berean, taldekide berriengandik asko ikasteko itxaropena dut". Eta Jorge Azanza Euskaltel-Euskadiko kirol zuzendariak ere izan ditu Iribarrentzat hitzak: "Juniorretatik aldea markatu duen txirrindularia da, urtero pausoz pauso aritu dena. Etorkizuna duen txirrindularia da".