Ibarra sokatira taldeak bigarren egin du Euskal Herriko Txapelketan, 600 kiloko kategorian. Beti Gazte izan da beste behin irabazlea; hirugarren postuan Txantrea sailkatu zen eta laugarrena Berriozar izan zen. Ibarrak eta Beti Gaztek nahiko ondo menderatu zituzten Txantrea eta Berriozar, eta beraien arteko lehian erabaki zen txapelduna. «Borroka handia izan zen, eta ia gurera ekarri genuen tiraldi bat», esan du Lander Otermin Ibarrako tiralariak. «Metro bat falta zitzaigun irabazteko baina akats txiki batzuk egin genituen eta azkenean bi aldeetara beraiek irabazi zuten. Tiraldi oso gogorrak izan ziren, baina beraiek jantzi zuten txapela».
Zortzikoen txapelketak asteburu honetan bukatuko dira, eta Ibarrak txapelketa mistoan parte hartuko du, hau da, lau emakumezko eta lau gizonezkoz osatua. Larunbatean jokatuko da, beste txapelketa guztiak bezala, Getxoko Fadura kiroldegiko pilotalekuan.