Guztira bost talde aritu ziren lehian larunbatean, Getxon, Euskal Herriko Sokatira Txapelketan. Emakumezkoen 500 kiloko mailaren txapela zegoen jokoan, eta Ibarra saria etxera ekartzeko asmoz joan zen. Baina, aurreko asteburuan bezala, harri berarekin egin zuen topo: Beti Gazte. Bigarren egin zuen Ibarrak, beste talde guztien aurkako tiraldiak irabazita, baina Beti Gazteren aurkakoak galdu egin zituen. Hirugarren Txantrea izan zen, laugarren Badaiotz eta bosgarren Berriozar. Antsoain parte hartzekoa zen, baina Covid-19aren neurriengatik ezin izan zuen joan Getxora.
“Oso lehiaketa polita izan zen”, azaldu du Ibarra taldeko Ainara Otamendi tiratzaileak. “Bigarren postuan geratu ginen, baina akaso aurrekoan baino gehiago lehiatzeko aukera izan genuen, eta Beti Gazteri pixka bat gerra gehiago emateko aukera izan genuen. Hala ere, erakutsi zuten indartsu zeudela eta berriro ere bigarren postuarekin konformatu behar izan dugu”.
Emakumezkoetan bi maila dituzte eta, beraz, bukatu dituzte goma gaineko txapelketak. Larunbat honetan gizonezkoen txanda izango da, 600 kiloko mailan, eta horrekin beraien parte hartzea amaituko da. Horren ondoren, Ibarrak txapelketa mistoan parte hartzeko asmoa du, eta hori martxoaren 27an izango da. Txapelketa mistoan lau emakumezkok eta lau gizonezkok parte hartzen dute talde bakoitzeko.