Guztira hiru probatan parte hartu dute, emakumezkoek batean eta gizonezkoek bitan, eta denetan bigarren postuarekin konformatu behar izan dute, hain justu, Beti Gazte taldearen atzetik hiruretan.
Emakumezkoen taldeak pisu handienean, 540 kilokoan, lehiatu zen larunbatean. “Gustura geratu ginen bigarren postuarekin”, esan du Ainara Otamendi taldeko kideak. “Beti esaten da, behin bigarren postua lortuta, txapela hain gertu ikusita, arantzatxo horrekin geratzen zarela. Gu 500 kilotan ginen, eta bagenuen beldur hori, ea zer moduz moldatuko ginen. Baina ondo moldatu ginen, eta sentsazio onekin itzuli ginen, eta hurrengo pisurako gogoz”. Beti Gazte izan zen irabazlea, eta hirugarren postuan Badaiotz sailkatu zen.
Larunbatean bertan lehiatu ziren gizonezkoak, pisu handienean ere, 680 kilokoan. Beraiek eta Beti Gazte taldekoak bakarrik lehiatu ziren, eta ibartarrek ezin izan zuten irabazi. “Tiraldi lehiatuak izan ziren, baina gureek ezin izan zuten garaipena eskuratu”, esan du Otamendik. Igandean mutilak bakarrik lehiatu ziren, kasu horretan, 640 kilotan. Beti Gazte izan zen garaile, ondoren Ibarra eta hirugarren Txantrea izan zen.
Egun bakarrera jokatzen ari dira txapelketak, hau da, zuzenean finala jokatzen dute, eta ez dago ligaxkarik, beste urteetan izaten den modura. Lehia guztiak Getxoko Fadura kiroldegian egiten ari dira. Asteburu honetan emakumezkoek beste txapelketa bat izango dute jokoan, larunbatean hain justu. 500 kiloko kategorian izango da, eta oraingoan ibartarrek aukera gehiago izan ditzakete txapela janzteko.
Argazkiak: Ane Zubelzu