Denboraldi honetako Euskal Herriko bigarren txapelketa jokatu da asteburuan sokatiran. Lauko modalitatean, Ibarrakoek bi bigarren postu lortu dituzte, emakumezkoek 240 kilotan eta gizonezkoek 300 kilotan. Bi modalitateetan Beti Gaztek irabazi du.
Emakumezkoak aurreko txapelketa irabaztetik zetozen, baina oraingoan ez da posible izan. Aurten taldekide gehiago daude eta bi talde eraman nahi zituzten txapelketara, baina neurri berriengatik bakarra eraman ahal izan dute. Hori horrela, tiratzaileak aldatu egin zituzten txapelketa batetik bestera. Beti Gazteren aurkako tiraldia galdu egin zuten eta Antsoainen aurkakoa berdindu. Azken sailkapenera zazpina punturekin iritsi ziren Ibarra eta Antsoain eta bigarren postua erabakitzeko tiraldian Ibarrak irabazi zuen.
Gizonezkoetan aurreko txapelketako emaitza bera lortu zuten. Orduan ere Beti Gaztek irabazi zuen, eta Ibarrak bigarren postuarekin konformatu beharra izan zuen. Ibarrakoek Beti Gazteren aurkako tiraldia galdu zuten, eta beste hirurak irabazi egin zituen.
Lauko modalitatean jokatu beharreko bi txapelketak jokatu ondoren, urtarrilean hastekoak dira zortziko modalitatekoak. Asmoa dago egiteko, baina federaziotik oraindik ez dago data zehatzik jarrita. Dirudienez, lauko modalitateko txapelketak egin nahi zituzten, eta horren ondoren balantze bat egin, martxan jarri diren protokoloak nola funtzionatu duten ikusteko.
Gizonezkoen Ibarra Sokatira Taldekoak, asteburuan lehiatzen. POTRONKO