Urte asko daramatzate Ibarrako herri sarreran elkarretaratzeak egiten, eta txandaka, senideek, lagunek edota eragileek antolatu ohi dituzte mobilizaio horiek. "Egungo momentuak, mobilizazio molde hori bere eginez, urrats bat aurrera egitea eskatzen duela pentsatzen dugu", esan dute antolatzaileek. Euskal presoen afera behin betiko konpontzeko, "harreman sareak biderkatu, aldarrikapena zabaldu eta mobilizazioak eraginkortu" behar direla diote.
Zentzu horretan, azken ostiraletako elkarretaratzea Ibarra sarreratik plazara lekualdatuko dute aurrerantzean. Ostiral honetan, ekitaldi "xume" bat egin nahi dute: plazako zutaberik luzeenean euskal preso eta iheslariak etxera dioen bandera "erraldoia" jarriko dute, 19:30ean plazan egingo den ekitaldian. Herritarrak eta eragile ezberdinak animatu nahi dituzte parte hartzera, "elkartu eta sareak eraikitzen jarraitzeko".