Etxean geratzeko agindua jaso bezian pronto, Alurr dantza taldeak lehiaketa bat jarri zuen martxan: bideo bat grabatzea zen erronka, 30 segunduz dantzan. Azaldu dutenez, uste baino jende gehiagok hartu du parte lehiaketan. Itxialdiaren ostean banatuko dituztela sariak aurreratu dute.
Bestalde, itxialdia dela medio, klaseen nondik norakoak eztabaidatzen aritu dira hainbat kide eta nola hala aurrera eramatea erabaki dute. Irakasleek bideoak grabatu dituzte dantzekin, eta plazako dantzak ikasteko ikastaro txikiak zabaldu dituzte. Klaseak online emateko aukera ere badute esku-artean. Ikasleekin kontaktua mantendu eta itxialdiak sortzen duen desmotibazioari aurre egin nahi diotela azaldu dute.
Era berean, gogoan dute Alurrek 25 urte betetzen dituela aurten. Esan dutenez, datak apur bat aztoratu zaizkie, baina hala ere festa handi baten asmoarekin jarraitzen dute, eta diote berandu baino lehen ospatu ahal izango dutela.