Gizonezkoen kategorian (600 kilo), Ibarra, Beti Gazte, Berriozar, Txantrea, Gaztedi eta Murueta taldeak ariko dira Euskal Herriko txapelaren bila eta azkenean Beti Gazte taldekoek eraman dute txapelketa, tiraldi guztiak irabazi ondoren.
Ibarrako taldea ere txukun aritu da etxean, eta hain zuzen, Beti Gazte ez beste talde guztiak garaitu ditu. 12 puntu lortuta, txapeldunorde geratu da.
Hirugarren postuan berdinduta geratu dira Berriozar eta Gaztedi, zazpina puntu eskuratuta. Desenpatea jokatu behar izan dute eta azkenean, brontzezko domina eskuratu ahal izan du Gaztedi taldeak. Atzetik sailkatu dira Murueta eta Txantrea.
Emakumezkoen ligaxka
Emakumezko kategorian (500 kilo), ligaxkako bigarren jardunaldia jokatu dute Ibarrako Belabieta kiroldegian eta hemen ere, Beti Gazteko nafarrek batu dituzte puntu gehien. Tiraldi guztiak irabazita, 15 puntu batu dituzte gaurko jardunaldian.
Badaiotz geratu da bigarren 12 punturekin, Txantrea hirugarren 9 punturekin, Gaztedi laugarren 6 punturekin, Ibarra bosgarren 3 punturekin eta Antsoain seigarren, puntu bakar bat ere eskuratu gabe.