Urteurrena ospatzeko ekitaldiak prestatzen hasiak dira Alurr dantza taldeko kideak. Hogeita bost urte beteko ditu taldeak aurten, eta ekitaldi bereziena ekainaren 5ean egingo dute. Alurr Eguna aprobetxatuko dute, oraingo dantzariez gain, lehendik dantza taldeko kide izan direnak oholtza gainean biltzeko.
Dagoeneko, hasiak dituzte entseguak dantzari ohiek: astearteetan edota asteazkenetan elkartzen dira. Alurren parte izan diren dantzari guztiak elkartzea da asmo nagusia: «Emanaldirako ongi prestatzea baino, elkartzea, ondo pasatzea eta gure garaiak gogoratuz dantza pare bat prestatzea da helburu nagusia».
EKITALDI GEHIAGO
Bestalde, urtarrilaren 31n emanaldia eskainiko du Alurr dantza taldeak Uzturpeko kultur astearen barruan. Aurtengo saioan Alurren historia kontatzen saiatuko dira, eta dantzaz gain antzerkia ikusteko aukera ere eskainiko dute. Horrez gain, otsailaren 7an, Pirritx, Porrotx eta Marimototsek Bizi Dantza ikuskizuna eskainiko dute Belabieta kiroldegian, 18:30ean. Sarrerak salgai daude Lurdes liburu-dendan, Errotatxon, Zubiaurren, Ogi Berrin, Goxobin eta Tolosako Asteasuarran, 7 euroren truke.