Lanak gaur hasiko direla iragarri du udalak: "Asfaltoa berritu eta irisgarritasun aldetik hobekuntzak egiteko lanei ekingo zaie. Atzo, egunean zehar, obrak gauzatzeko prestaketak egin zituzten. Aurreikuspenen arabera eta eguraldia lagun izan ezkero, 8 aste iraungo dute berriztatze lanek".
Errepidea goratu egingo dela iragarri dute udaletik, espaloiaren altueran jarriz. Horrela, irisgarritasun baldintza egokiak eskaini nahi dituzte. Lanen parte izango da baita ere, zebrabidea lekuz aldatzea. Guzti hau, Emeterio Arreseko frontoitik Otarrega kaleko bide gurutzerainoko tartean egingo da.
Lanek trafikoan eta aparkalekuetan eragina izango dute eta "inguruko biztanleei aurrez barkamena eskatu nahi zaie", sortu dakizkiekeen eragozpenengatik. Lanen ordutegian, 8:30etik 17:00etara (lanegunetan), garajea duten ibilgailuak bakarrik sartu eta irten ahalko dira. Ordutegi hortatik kanpora, gainerako ibilgailuak ere sartuko dira, baina aparkaleku gutxiago egongo dira lanengatik.
Emeterio Arresen egingo diren asfaltatze lan hauetarako lehiaketa Asfaltos Uribe S.A.k irabazi zuela jakinarazi du udalak, eta 97.494,72 eurotan esleitu zitzaiola lana.