Lehen zatiko zortzigarren minutuan estu zihoazen gauzak, eta markagailuak banako berdinketa erakusten zuen. Hortik aurrera, ordea, Lauburu erabat nagusitu zitzaion Goierriko taldeari, eta atsedenaldirako hiru goleko errenta zuten ibartarrek: 4-1. Bigarren zatian, gol gosez kantxaratu ziren moretxoak, eta horrela, dozena erdi bat gehiago sartu zizkieten goierritarrei. Hauek, 2-5 gerturatu baziren ere, ez zen nahikoa izan ibartarren jokoa aldatu, eta ezustekoan pentsatzen jartzeko.
Iñigo izan zen partidako jokalari onena, lau gol sartu baitzituen. Oihanek bi baloi sareratu zituen, eta Aldalurrek, Saldisek, Juaristik eta Zumetak, berriz, bana.
Laskoraingo neskak, finalerdietan
Atzo finalak jokatu baziren ere, Gipuzkoako Kopako finalerdiak ostiralean jokatu ziren. Mutilek Donostian jokatu zituzten, eta neskek, berriz, Astigarragan. Nesken kasuan, eskualdeko talde bat izan zen: Laskorain. Hauek, ordea, ezin izan zuten ezer egin, gerora txapeldun suertatu zen Ordizia talde indartsuaren aurka. Tolosarrek 6-2 galdu zuten.