Gaurkoa ez zen nolanahiko erronka Lauburu K.E-ko arduradunentzat. Lehen aldia zen soilik neskez osatutako taldeen arteko txapelketa antolatzen zutela, eta emaitza oso ona izan da. Lauburuk Euskal Herriko eta Espainiako estatuko klubak gonbidatu zituen parte hartzera. Zaragozako Cesar Augustak infantil eta benjamin taldeak eraman ditu; Iruñeko Osasuna Lacturale Orvina infantil mailako taldearekin joan da; eta Kantabriako Muslerak, berriz, benjamin neskak eraman ditu Ibarrara. Partidak 25 minutukoak izan dira, eta maila bakoitzeko hiru taldeek elkarren aurka jokatu dute.
Festa giroa eta aldarrikapena uztartzea ziren gaurko helburuak, eta guztiz lortu dira. Emakumezkoen areto futbola bultzatzeko beste aurrera pauso bat izan da. Harmailak jendez bete dira, eta Kantabriatik nahiz Zaragozatik autobusetan bidaiatu dute jokalariek eta familiek. Gainera, festarekin gutxi ez, eta maila handiko jokalariak ikusteko aukera izan da. Joko garbia nagusitu da, eta golak ere ikusi ahal izan dira. Behin txapelketa bukatuta, Lauburuk gainerako klubak bazkaltzera gonbidatu ditu, Xepla elkartera.
Urte berriarekin batera, bestelako helburu batzuei heldu beharko die Lauburuk: Gipuzkoa mailan areto futbola egonkortzea, harrobia sortzea eta emakumeen parte hartze aktiboa bultzatzea.